அவன் யார்..?

கொஞ்சம் சண்டை

கொஞ்சம் சமாதானம்...

கொஞ்சம் கொஞ்சல்

கொஞ்சம் மிஞ்சல்..

கொஞ்சம் குறை கூறல்

கொஞ்சம் குழைதல்...

இன்னும் பிற.. அடித்து போகிறது

ஆழ் கடலென ததும்பும் அவன்-

நிறைய அன்பில்...!

நாள் தோறும் நமக்குள்

காதலை சொல்லும்...

ஒப்பனை வார்த்தைகள் இல்லை..

நிச்சயமாய் அது தேவைப்படவில்லை..

நாமறிந்திருக்கிறோம்-

நமக்கான புரிதல்களை..!

இன்று-

நீ என் வாழ்வில் வந்த நாளென்று

வாழ்த்துக்கள் வருகிறது...

தேதிக்குள் தேக்கி வைத்து

கொண்டாட  நமக்கு அவகாசமில்லை..

நேசத்திற்கு அளவீடாய்-

ஆடையும், அணியும் பதிலுக்கு

ஒரு முத்தமும் தேவைப்படாமல்...

நாளும் நாளும் நதியாய் சுரந்து

நகர்ந்து கொண்டிருக்கிறது நமக்கான காதலும், நட்பும்..!

வழக்கம் போல் பயணித்து கொண்டிருக்கிறோம்..!

அவன் என் கணவன்- தோழன்..!