கவிதை

பேச்சுலர் அரண்மனை

கலைந்த பொருட்களில்

இறைந்து கிடக்கும் கலை நயம்

தினசரிகளில் ஜன்னலாய்

தெரியும்..

வேலைவாய்ப்பு செய்தி

கிழித்த பக்கங்கள்..!

நேர்முக  தேர்வின் கதவடைப்பு

‘ப்ச்’ ஒற்றை சொல்லோடு புகையும்..!

வாரமொரு முறை

ஊரிலிருந்து தவறாத அழைப்புக்கள்

என்னப்பா என்ற அம்மாவின் விசாரிப்பில்

வேலை கிடைத்து விட்டதா கேள்வியும்

எப்பண்ணா வருவே தங்கையின் பாசத்தில்

பிடித்ததை கேட்க முடியாத தவிப்பும்…

மறைந்து கிடக்கும்..!

எதோ ஒரு நண்பனுக்கு

வேலை கிடைக்கும்..

உங்களுக்கும் நல்ல வழி கிடைக்கும்

ஆறுதல் சொல்லி கிளம்புவான்..!

அறையின் வருகை பதிவேடு

அடுத்த நாளே

இன்னொருவனை சேர்க்கும்..!.

அவர்களுக்கான உலகம்

இருந்து கொண்டேயிருக்கும்,

புதுப் பட பாட்டு,

விலை வாசி உயர்வு

குடும்ப சுமை

சைட் அடித்த பெண்..

சுமைகளோடு கழிந்தாலும்

சுகங்கள் இருக்கத்தான்

செய்யும்…

சூரியனும்.. சந்திரனும்

அவர்களை துரத்துவதில்லை..

அவர்கள் ராஜாக்கள்…!

கவிதை ( அனாதையான முதியவர்கள் )

"  அனுபவ பொக்கிஷம் "

கடந்து வந்த
பாதைகளின்
' முக'வரிகள்...
பிரயாணித்த
தடங்களின்
அனுபவங்கள்..
ஓடியாடி உழைத்த
நாட்களை
தளர்ந்த நடையிலும்
தளராமல் அசை போடும்
முதுமை..!
பழையன கழிதலும்
புதியன புகுதலும்
ஜட பொருள்களுக்குதானே...?
அனுபவ பெட்டகமான
முதியோர்களை
போற்றி பாதுகாப்பது விட்டு
வீதியில் ஏன் தொலைத்துவிடுகிறீர்..?

கவிதை :

சொன்னது என்னாச்சு..?

மாற்றல் வந்தது

மாறாத அவள் நினைவுகளோடு

இடம் பெயர்ந்தேன்

தொலைவில் இருந்தாலும்

தொலைபேசி சேர்த்தது.

காலம் வரும் வரை

காத்திருக்க கேட்டேன்..

காலம் கனிந்தது

இனிப்பான  செய்தி

சொல்ல

சொல்லாமல்  தேடிப்போனேன்..

மன்னித்து விடு

காலம் தாழ்த்தியதுன் தவறென்றாள்..

ஒரு  நாள் வாழ்ந்தாலும் உன்னோடுதான்

வாழ்வேன் என்றுரைத்த அவள் -

 இன்னொருவன் மனைவியாய்..!

' சொல்வதெல்லாம் உண்மை..! '

கவிதை:

' சொல்வதெல்லாம் உண்மை..!  '

 எனக்கு பிடித்ததை

கேட்டாள்….

ஒன்று மட்டும்தான் உலகில்-

உயிராய் கலந்த நீ

சொல்ல வந்ததை

மெல்ல முழுங்கி..

முதலில் நீ சொல் என்றேன்

வரிசையாக சொன்னாள்..

சல சலக்கும் நீரோடை ..

பச்சை பசேல் வயல்…

மெல்ல தீண்டும் தென்றல்…

கண்ணுக்கு விருந்தாய்

காட்சிகளை சொல்லிக் கொண்டே

போனவள்-

கடைசி வரை

செவிக்கு மட்டும் படைக்கவில்லை…

‘ என்னை பிடிக்கும் ‘ என்று சொல்லி…!